Rakel Ósk hefur alltaf haft áhuga á hundum og byrjaði að æfa sig að sýna þegar hún var fjögurra ára. Hún
byrjaði að taka þátt í keppni ungra sýnenda strax og hún hafði aldur til, 10 ára, og keppti til 17 ára aldurs. Hún var Besti ungi sýnandi ársins, árin 2005, 2006 og 2007 og keppti fyrir Íslands hönd á Crufts árin 2006, 2007 og 2008. Crufts er stærsta hundasýningin í Bretlandi og þar keppir einn ungur sýnandi frá hverju landi um besta unga sýnandann í heiminum. Árið 2006 sýndi hún hund af tegundinni Tíbet spaniel og lenti í „topp 11“ af 32 keppendum. Árið 2007 sýndi hún hund af tegundinni Australian Shepherd og lenti í „topp 10“ af 36 keppendum. Árið 2008 sýndi hún tík af tegundinni Australian Shepherd en þrátt fyrir góða frammistöðu komst hún ekki í úrslit. Hins vegar vakti hún athygli eins besta atvinnusýnanda Bandaríkjanna, Brian Livingston, og bauð hann henni að koma til sín í vinnu sumarið 2008. Hún ferðaðist með honum, konu hans og aðstoðarfólki um Bandaríkin og fór á fjöldann allan af sýningum þar sem hún sýndi hunda og undirbjó feld hundana fyrir sýningarhringinn. Það skiptir virkilega miklu máli hvernig hundurinn lítur út inn í hring og Rakel Ósk lærði mikið um feldhirðu hjá honum enda eru Bandaríkjamenn fremstir á því sviði. Hún lærði einnig mikið hvernig haga skuli sér innan sýningarhringsins og um framkomu á sýningarsvæðinu, ekki það að hún hafi þurft að bæta sína framkomu, en miðað við það sem hún upplifði þarna komst hún að því hvernig ætti EKKI að hegða sér því framkoma sýnenda í Bandaríkjunum er allt önnur og harðari en sú sem við eigum að venjast hér á landi. Þetta er reynsla sem hún á alltaf eftir að búa að og óskar þess að sýnendur á Íslandi muni ekki glata þeim góða anda sem enn ríkir á sýningum hérlendis.
Rakel Ósk hefur unnið hjá fleiru reyndu hundafólki. Sumarið 2004 fór hún til Bretlands að vinna hjá rough collie og border collie ræktendunum Alan og Pat Wilkinson. Þar var hún aðallega að sýna, umhverfisþjálfa hvolpa og sjá um almenna umhirðu hundanna.  Í sömu dvöl ferðaðist hún um Bretland með boxer-ræktandanum Liz Davies og heimsótti marga ræktendur, þar á meðal Classicway cocker- ræktendurna og boxer-ræktandann Sue Harvey, Faerdorn. Sumarið 2009 fór hún til Noregs að vinna hjá Afghan hound og Greyhound-ræktendunum Åke Gjetnes og Espen Engh. Þar sá hún um daglega feld- og umhirðu hundanna ásamt því að sýna af og til. Þar hitti hún marga ræktendur á sýningum og lærði mikið, enda miklir reynsluboltar þar á ferð.
Árið 2006 byrjuðu Norðurlöndin að keppa sín á milli í keppni ungra sýnenda og er keppt í einstaklings- og liðakeppni. Rakel Ósk var í landsliðinu árin 2006 og 2007 og lenti Ísland í 2. sæti bæði skiptin. Þjálfari stúlknanna var Auður Sif Sigurgeirsdóttir.
Rakel hefur sýnt margar hunda sem hefur gengið vel hérlendis, t.d ISShCh Bjarkeyjar Sólrík, ISShCh Bjarkeyjar Nina Ricci, ISShCh Bjarkeyjar Hugo Boss, ISShCh Biding My Time at Faerdorn, ISShCh Sturlunga Tumi ungi Kolbeinsson, INTUCH ISShCh Himna Ripp (stigahæsti Chihuahua 2009) og marga fleiri sem hafa fengið meistarastig undir hennar stjórn, t.d. Birkilundar Lærke, Hrísdals Engla Elliði, Arnarstaða Askur og Bjarkeyjar Out Of The Blue.